一直都好想一個人去旅行，唔使煩麻，想去邊就去邊，幾時出發就幾時出發，行程編排完全自己話事，唯一苦惱係食野方面啫，一條友，唔試得好多款野 。
上年十一月同屋企人去左上海同大阪，上海係自己飛過去join佢地，大阪就自己飛同埋最後一日係自己一個人玩，叫做試過下一個人去坐飛機，一個人喺外地旅行，之後就決定自己一個去一次旅行喇 。
首先，其實無諗目的地同時間既，咁啱十二月見到 HK Airline 做特價，就睇下有咩地點揀，比我見到沖繩喎，連埋復活節假期去一個星期，機票連稅$2711 （之前坐 HK Express 去大阪要$3xxx）, 即刻扑搥，諗住去日本可以睇櫻花。
買完機票就諗行程，因為成日聽人講，沖繩公共交通比較差，所以d人多數係自駕遊，但我係無車牌既，所以就走左去買本旅遊書刨下喇，點知打開第一頁，oh no，沖繩花季係一至二月呢，復活節過去係睇唔到櫻花，擺左個大烏龍，哈哈。
沖繩既交通工具包括市內既單軌列車，巴士同埋觀光巴士，我既行程將會係住兩晚那霸，三晚名護然後一晚番那霸。
一開始係搵民宿，因為成日想住下日式d既房間，但發現好多想住既都要揸車先去到，或者好貴，最後轉移搵近市集既，揀左 lohas villa，呢間係要共用浴室，同埋d房細到不堪的，不過諗住多數都係喺街，所以細d都無所謂，叫做試下先。
至於名護三晚酒店，一心想要搵間望海既，揀左kies beach hotel，因為疑似好近巴士站，價錢又唔貴，但又一次大頭蝦，三月中至發現原來book錯左山景房，但網頁顯示已經無晒其他房，算啦，其實酒店好近海灘，到時早d落去hea啦
最後一晚會番那霸住，因為第二朝一早機，搵左tune hotel naha, $3xx一晚，有諗過轉埋頭兩晚過黎，咁行李就可以寄存啦，但發現價錢爭好遠呢，所以打消左呢個念頭。
早排收到email，去程班機改遲左45分鐘，變相去到日本已經三點幾四點，決定先碌過去睇outlet，因為最尾嗰日一早機，無得去，又未行過日本outlet，所以今次點都要分d時間去下。但因為收到改機呢個電郵，我先走去再望下機票，原來買左business saver，我有冇睇錯呀? 又再一次擺烏龍，希望今次係錯有錯著啦。
總結今次行程計劃：
第一至三日：那霸 （國際通，首里城）
第三至六日：名護 （潛水，海洋館，美國村）
第六日 ：那霸
淨係諗左以上必到景點，詳情完全未諗，到時先算，淨係搵左點坐車去三間酒店咋，呢個旅程計劃認真hea
